Naglusad ang Department of Agriculture (DA) og duha ka adlaw nga forum nga nagtumong sa pag-awhag sa mga overseas Filipino workers (OFWs) sa Hong Kong ug Macau nga magpahigayon og negosyo sa agribusiness isip usa ka reintegration strategy sa ilang pag-uli sa Pilipinas.
Ang “Usapang Agribiz: Forum on Agribusiness Opportunities in the Philippines” gipahigayon kaniadtong Hunyo 28 sa Macau ug Hunyo 29 sa Hong Kong, nga gitambungan sa 214 ka partisipante diin, 87 ang sa Macau ug 127 usab sa Hong Kong.
Kini usa ka bahin sa mas halapad nga adbokasiya ni Pangulong Ferdinand Marcos Jr. nga ilhon ang mga OFW dili lamang isip mga economic contributors, kundi isip potensyal nga mga mutaguyod usab sa food security ug rural development.
Gipangunahan kini ni DA Assistant Secretary Genevieve Velicaria-Guevarra, diin iyang gisaysay ang suporta sa gobyerno alang sa mga OFW nga laraw magsugod og negosyo sa agrikultura.
Gihisgutan usab sa forum ang mga oportunidad sa livestock, high-value crops, mga training programs, loan ug credit facilities, ug crop insurance gikan sa nagkadaiyang mga ahensya sa DA susama sa Bureau of Animal Industry, Agricultural Training Institute, ug Agricultural Credit Policy Council.
Sumala pa sa DA, nga magpadayon kini sa paghatag og technical assistance, mentorship, ug market access alang sa mga OFW nga interesado.
