Gibuhi Pag-usab ni Senador Joel Villanueva ang Anti-Endo Bill.
Gipasiugdahan pag-usab ni Senador Joel Villanueva ang iyahang giuswag nga Anti-Endo Bill, nga nagtinguha sa pagwagtang sa kontraktuwalisasyon o ang “endo” sa nasud.
Ang maong panukala nga gitawag og Security of Tenure and End of Endo Bill maoy gihimong prayoridad sa senador alang sa pag-abli sa 20th Congress niadtong Hunyo 30.
Tumong sa balaodnon nga usabon ang pipila ka probisyon sa Labor Code aron mas klaro nga dili tugutan ang labor-only contracting (LOC) usa ka porma sa kontraktuwalisasyon nga wala maghatag og permanenteng trabaho sa mga empleyado.
Sumala pa ni Villanueva, nga pinaagi sa maong sugyot, gihatagan og gahum ang mga industry tripartite councils aron sila mismo ang mulantaw kung unsa nga mga trabaho ang direktang adunay kalabutan sa nag-unang negosyo sa usa ka principal o contractee.
Naglaum ang senador nga masuportahan kini sa iyahang mga kauban sa Senado ug sa Malacañang, aron mapadali ang pagpasa sa balaodnon ug matapos na ang dugay nang isyu sa endo nga nagpaantos sa kadaghanan nga mga trabahador sa Pilipinas.
