Gikuha na sa Department of Agriculture (DA) ang pagdili sa pag-import sa mga domestic ug wild birds, lakip na ang karne sa manok ug ubang mga produkto gikan sa unom ka estado sa Estados Unidos, diin mao ang Indiana, Maryland, Missouri, New York, Ohio, ug Pennsylvania.
Matod pa ni Agriculture Secretary Francisco Tiu Laurel Jr., sa gipagawas nga Memorandum Order no. 32, gilatid niini nga gidili ang importasyon tungod sa pagsugod sa pagpanagtag sa highly pathogenic avian influenza (HPAI).
Gipahunong na ang import ban human makumpirma sa veterinary authority sa US nga nasulbad na ang pagkatag sa maong sakit.
Dugang pa ni Laurel, nga ang nag-unang gitan-aw sa ilahang departamento mao ang pagpanalipod sa lokal nga poultry industry, nga usa ka mahinungdanon nga bahin sa food security plan, ug usa usab ka dakong tinubdan sa kita ug pagpalig-on sa ekonomiya sa nasud.
Gilauman sa DA nga ang pagbalik sa importasyon gikan sa US, diin makatabang kini sa pagpalig-on sa suplay sa poultry products sa Pilipinas ug makapamenos sa pressure sa presyo sa maong mga produkto.
Bisan pa man niini, magpabilin gihapon ang hugot nga pagbantay sa DA, ug gibutyag nga bisan pa og gi-allow na ang importasyon, ang tanang kargamento dapat masusi pag-ayo aron masiguro nga kini mosunod sa veterinary quarantine protocols ug mga food safety regulations sa ilang buhatan sa dili pa ibaligya sa merkado.
