Mokabat sa dul-an P400,000 ang nakumpiska nga iligal nga droga kon shabu human nababagan kini sa usa ka checkpoint kaganihang buntag sa mga personahe sa Taskforce Davao ug mga kapulisan.
Subay sa report sa mga otoridad, alas 11:30 kaganihang buntag, usa ka joint operation sa Task Force Davao ug Davao City Police Office ang gipahigayon sa Sirawan Entry Point ang miresulta sa pagkasikop sa usa ka suspetsado tungod sa kalapasan sa Republic Act 9165 (Comprehensive Dangerous Drugs Act of 2002).
Giila sa sa mga otoridad ang suspetsado nga si alias John Michael, 27 anyos, ulitawo, ug residente sa VSM Heights Phase 2, Lot 11, Block 10, Brgy. San Isidro, General Santos City.
Subay sa report, nagsakay ang nahisgutan sa Black MG nga sakyanan nga adunay plate number MBF 3012 ug padulong sa dakbayan sa sa Davao.
Nasakmit gikan sa iyang sakyanan ang duha (2) ka mga pakete sa iligal nga droga kon shabu, nga adunay gibug-aton nga 49.83 gramos, ug gibana-banaan nga nagkantidad og Php 373,725 ang street value niini.
Tungod sa maong kalampusan, gipasidunggan ni Col. Mariñas Jr., Commander sa Task Force Davao, ang mga ginsakpan niini sa walay puas nga paningkamot ug ingon man sa DCPO sa ilang hugot nga pagbantay ug pag-screen sa mga tawo ug sakyanan sa tanang entry points sa siyudad.
Ang suspetsado ug ang mga ebidensiyang nakuha giturn-over na sa Toril Police Station nga karon nagtingkagol usab ang suspetsado.
