Nasakmit sa mga ahente sa National Bureau of Investigation (NBI) XI ug Philippine Drug Enforcement Agency (PDEA) XI ang gibanabana nga P17 milyon nga kantidad sa shabu ug P5 hangtod P6 milyon nga kantidad sa marijuana kush atol sa sayo sa buntag nga operasyon kagahapong adlawa, Hunyo 8, 2025, sa usa ka balay sa Emily Homes, Cabantian, nga gituohang stock house sa usa ka drug syndicate.
Gisugdan ang operasyon mga alas 5 sa buntag.
Sumala pa ni NBI XI Director Atty. Arcelito Albao, nga nagsugod ang operasyon human sila makadawat og impormasyon gikan sa usa ka impormante nga mao usab ang caretaker sa balay.
Giingon pa ni Albao nga gigamit sumala pa ang food delivery services isip tabon sa illegal nga kalihokan.
Kauban ang abogado, midangop ang impormante sa buhatan sa NBI ug nagtudlo sa maong balay nga adunay isug nga baho ug adunay mga senyales sa marijuana.
Dugang pa niini, nga wala pa’y nadakpan sa maong raid apan nailhan na nila ang mga target sa operasyon, ug nakakuha usab sila og dugang nga drug paraphernalia.
