Gilugwayan sa Department of Agriculture (DA) hangtod sa katapusan sa Hunyo ang deadline alang sa pagproseso sa mga import permit sa isda ug seafood, aron mahatagan ug igong panahon ang mga importer nga makatuman sa bag-ong polisiya nga nagtinguha nga sulbaron ang food inflation ug lig-onon ang suplay alang sa mga industriya sama sa turismo ug hospitality.
Ang maong lakang maoy subay sa mando ni Pangulong Ferdinand Marcos Jr. nga himuong mas sistematiko ang fish importation aron nga makamugna og trabaho ug makaengganyo og pamuhunan.
Ubay sa datos sa ahensya, sa kinatibuk-ang 25,000 metriko tonelada nga seafood nga gitugotan nga iangkat alang sa food service sector, 25% pa lamang ang nasulod. Matod pa ni Agriculture Secretary Francisco Tiu Laurel Jr., kulang sumala pa sa panahon ang mga nakalabayng deadline ug wala sa season ang uban sa mga produkto nga gigikanan sa ubang nasud.
Lakip sa mga produktong gitugotan nga iangkat mao ang mga kulang sa lokal nga merkado sama sa salmon, cod, tuna by-products, squid, scallops, octopus, ug lobster.
Ang sardinas lamang ang lokal nga species nga gitugotan nga iangkat aron matabangan ang pagpugong sa inflation sa panahon sa off-season. Gipahibalo usab nga ang mga importer nga adunay akreditasyon ubos sa Fisheries Administrative Order (FAO) 195 o narehistro sa FAO 259 lamang ang kwalipikadong makapangayo og Certificate of Necessity to Import (CNI).
Gilauman sa DA nga pinaagi sa bag-ong paglugway, magamit ug husto ang gitugot nga import volume. Samtang, gisugdan na usab ang tinuig nga closed fishing season sa Davao Gulf sugod Hunyo 3 hangtod Agosto, subay sa Bureau of Fisheries and Aquatic Resources (BFAR).
