Gisiguro sa City Health Office (CHO) sa Davao City nga andam ug nagalihok na ang mga response protocols batok sa Monkeypox (Mpox). Giklaro usab sa kagamhanan sa syudad nga wala kini ilawom sa Modified Enhanced Community Quarantine (MECQ) o bisan unsang klase sa lockdown, taliwala sa naglutaw nga impormasyon sa social media.
Kalabot niiini, gihangyo sa CHO ang publiko nga magmatngon ug mag-verify una sa mga balita sa online aron malikayan ang kahadlok ug panic. Gi-awhag usab ang katawhan nga sundon ang minimum health protocols sama sa sakto nga pagpanghugas sa kamot sulod sa duha ka minuto, paggamit ug alkohol, disinfection sa mga gamit ug palibot, ug paglikay sa intimate o direct skin contact ilabi na sa mga may sintomas sa Mpox.
Samtang gipahimangnoan ni Dr. Sofia Corazon Zafra, CHO Medical Coordinator, nga ang pagsul-ob og facemask ug sayong pagpacheck-up makatabang sa pagpugong sa pagkaylap sa virus. Gisaysay usab niya nga ang Mpox usa ka zoonotic disease nga posible makuha gikan sa hayop, ilabi na sa mga mamalya nga adunay simtomas sama sa rashes, kalintura, ug kawalay gana mokaon. Dugang pa, gihangyo niya ang publiko nga magpabiling kalma ug magpatan-aw dayon sa healthcare provider kung adunay sintomas.
Para sa tabang, makontak ang CHO-CESU sa 09495011457, CHO OPCEN sa 0945 813 6065, ug uban pang hotline numbers. Napulo na ka kaso sa Mpox ang natala sa syudad, apan ang tanang pasyente anaay stable nga kondisyon ug gi-monitor sa pasilidad subay sa gi-isyu nga DOH Memorandum No. 2024-0306.
