Giaprubahan na sa Davao City Council ang ordinansa nga nagtumong sa pagtukod sa Davao City Public Internet Center diin adunay duha-ka-andana nga pasilidad nga gituyo aron mas mapadali ang access sa teknolohiya ug impormasyon sa publiko.
Ang maong center pagatukuron nga adunay 60 ka computer units sa ikaduhang andana samtang unom sab ka units ang ibutang sa ubos alang sa Persons with Disabilities (PWDs). Sumala ni Councilor Bonz Andre Militar, Chairperson sa Committee on Information Technology, ang proyekto magpadayon sa libre nga serbisyo sa internet ug computer-use nga kasamtangang ginahatag sa Davao City Library and Information Center (DCLIC).
Dugang ni Militar, abli kini para sa tanang Dabawenyo nga magparehistro lamang sa City Library uban sa P100 nga annual registration fee, apan once registered, unlimited na ang paggamit sa serbisyo sa center. Sa higayon nga moagi sa ikatulo ug katapusang pagbasa, apil na sab sa supplementary budget karong tuiga ang pondo alang sa pagtukod sa pasilidad.
