Gikanayon sa Persons with Disability Affairs Office (PDAO) sa Davao City ang kabalaka tungod sa nagpadayon nga kakulangan sa accessible nga mga estruktura sa dakbayan, bisan pa sa dugay nang pagpatuman sa Accessibility Law o Batas Pambansa Blg. 344 sukad pa sa tuig 1992.
Matod ni Atty. Redendo Martinez, hepe sa PDAO, nga daghan gihapong mga pribado ug pampublikong estruktura ang wala makahatag og ramps, railings, ug uban pang pasilidad nga angay para sa mga Persons with Disabilities (PWDs).
Tungod niini, daghan sa ilang sektor ang nadismaya nga mo-eskwela o mangita og trabaho, tungod kay lisod ang ilang paglihok sa ilang palibot. Dugang pa, gisugdan na sa buhatan ang inspeksyon sa mga pampubliko ug pribadong building aron masiguro ang pagtuman sa balaod.
Gihisgutan usab ni Martinez ang posibleng pagtukod og Task Force on Accessibility aron mas epektibo nga marepresentar ang mga panginahanglan sa PWD community.
Samtang gipahimangnoan sab sa PDAO ang mga negosyong padayon nga nagpasagad sa balaod nga mahimo silang mapakyas sa pagkuha og business permit kung magpabiling dili motuman.
