Gipaningkamotan karon sa lokal nga kagamhanan sa Davao ang hingpit nga pagpatuman sa Davao Bus Project nga kanhi gitawag og High Priority Bus System (HPBS) diin gilauman nga moluwas sa dakbayan sa grabehan nga trapiko. Matod ni Atty. Tristan Dwight Domingo, assistant city administrator ug project manager sa maong proyekto, mao kini ang labing epektibong paagi aron matubag ang kapin 90 porsyento sa problema sa pampublikong transportasyon. Gidugang pa niya nga bisan pa sa pagpalit og napulo ka bus, dili kini igo kon walay tibuok implementasyon sa sistema.
Kahinumduman, ang proyekto gisugdan og feasibility studies sukad pa niadtong 2011 ug giila nga usa sa pinakadakong lakang sa siyudad para sa long-term development. Nadugay lamang ang kalihokan tungod sa legal ug teknikal nga proseso sama sa revalidation sa NEDA ug panginahanglan og yuta alang sa mga terminal ug bus stops. Sumala sa DOTr-Davao, natural lamang nga mokabat og panahon ang usa ka komplikado nga proyekto sama niini.
Lakip sa plano ang pagpatukod og 1,105 ka bus stops ug pagpadagan og 1,105 ka bus sa 29 ka ruta nga naglangkob sa 672 kilometros nga mga dalan. Gilauman nga magsugod ang operasyon niini sa 2025. Samtang naghulat pa sa kumpletong implementasyon, gipaluyohan sa siyudad ang Peak Hours Augmentation Bus Service (PHABS) ug napalit ang dugang nga mga bus aron matabangan ang kasamtangang pasahero sa ilang pang-adlaw-adlaw nga biyahe.
