Kabsan sa kinabuhi ang usa ka 23-anyos nga utility worker nga giilang si Gilbert Anggob y Dumayhag, human kini gipusil sulod mismo sa ilang balay sa Purok 9, Sitio Bagong Silang, Barangay Baganihan, Marilog District, Davao City, alas 5:43 sa kaadlawon, niadtong Abril 29, 2025.
Ang biktima mao ang pag-umangkon sa kanhi barangay kagawad nga si Ricky Anggit.
Sumala sa imbestigasyon sa Marilog Police Station, ang biktima ana sulod sa balay sa dihang kalit nga misulod ang wala mailhing suspetsado ug namusil gamit ang armas nga gituohang kalibre .5.56mm.
Matod pa anaa sa gawas sa illang balay si Ricky ug nangihi, apan sa wala damha ngakadungog kini og kalit nga buto sa pusil hinungdan nga dali kining misulod sa balay ug nasayrang nagbuy-od na iayang pag-umangkon ug nagkadugo.
Matod pa usab sa mga silingan, nadungog nila ang sunod-sunod nga buto sa armas duol sa lugar.
Base sa imbestigasyon, gituohang posibleng nasayop ang suspetsado tungod sa mga pasumbingay nga si Ricky unta ang target sa pagpusil.
Apan sa pagkakaron, padayon ang mas lawom nga imbestigasyon sa kapulisan aron masuta ang motibo ug identidad sa responsable sa maong krimen.
