Subling gibutyag sa Malakanyang ang panawagan nga mobalik na sa nasud si kanhing Presidential Spokesperson Harry Roque nga kasamtangang anaa sa The Hague, Netherlands.
Sa Press Briefing sa Palasyo, gibutyag ni Palace Press Officer USec. Claire Castro, nga daw nangayo na og tabang si Roque aron lang mapamatud-an ang iyang walay basihang akusasyon batok kang Pangulong Ferdinand Marcos Jr. Ang reaksyon ni Castro misunod sa bag-ong mga pahayag ni Roque nga nag-ingon nga nagagamit og iligal nga droga ang Pangulo.
Usa ka ebidensya niini mao ang iyahang hagit kang Presidential sister ug Senator Imee Marcos nga pamatud-an nga bangag ang Pangulong Marcos. Dugang pa ni Castro nga base sa mga gipangbutyag ni Roque karon, mahimo na siyang tawgon nga usa ka peddler sa fake news. Si Castro usab miingon nga si Roque ang naa sa likod sa “polvoron video” nga naglambigit kang Pangulong Marcos. Kini base sa giingon nga rebelasyon sa vlogger nga si Pebbles Cunanan sa gihimong pagdungog sa Tricommittee.
