Mugamit ang Department of Agriculture (DA) og maximum suggested retail price (MSRP) sa baboy sugod Marso 10, Lunes.
Sumala ni Agriculture Secretary Francisco P. Tiu Laurel Jr., ang presyo sa liempo ipatuman sa P380 matag kilo, samtang ang kasim ug pigue mahimong P350 matag kilo. Kini ipatuman sa mga merkado base sa National Capital Region.
Gipasiugda ni Laurel nga kini nga desisyon resulta sa konsultasyon sa mga negosyante, mamaligyaay, ug mga prodyuser sa baboy.
Samtang, ang DA mag-usab sa MSRP human sa usa ka bulan aron masuta kung kinahanglan ba nga naay kausaban sa presyo.
Apan, ang MSRP dili ipatuman sa mga supermarket ug hypermarket tungod sa ilang mas taas nga galastuhan sa operasyon.
Kahinumduman sa miaging Pebrero, nisaka og 12.1 porsyento ang presyo sa baboy sumala sa Philippine Statistics Authority.
Gipasabot ni Assistant Secretary Divina Gracia Del Prado nga ang African swine fever padayon nga nakaapekto sa supply sa baboy sa nasud.
Apan, gilauman nga ang MSRP makatabang sa pagpamenos sa pagsaka sa presyo sa baboy.
