Ubos sumala pa ang ihap sa mga kabataaan nga nagpahimulos sa bakuna, bisan paman sa gipakusgan nga School-Based Immunization (SBI) program sa dakbayan.
Gikanayon ni Dr. Analiza S. Malubay, National Immunization Program City coordinator, nga daghang mga ginikanan ang nagduha-duha pa kung tugtan ang ilang mga anak nga modawat sa ilang mga bakuna gumikan sa mali nga mga pagtuo nga makuha sa pag-bakuna.
Dugang pa niini nga dunay ubang mga ginikanan nga nagatuo sa mga “fake news” nga gi-post sa nagkadaiyang social media platforms. Gisiguro ni Malubay nga ilang pakusgan ang ilang ‘information drive’ ug tinoud kanunay sumala pa ang mga impormasyon nga ginapaambit niini.
Matud pa niini, nga ang barangay health workers makatampo pinaagi sa pagpakatag sa sakto nga impormasyon sa ilang nagkadaiyang mga barangay.
Giesplikar ni Dr. Joy A. Espina, DHO Talomo North ug Child Health City coordinator, nga ang uban rason sa mga ginikanan nga wa tugti ang ilang mga anak nga mabakunahan, naglakip sa pagtuo nga human na kini bakunahi sa dihang mga bata pa.
Gipaklaro ni Espina nga dugay na kini nga mga bakuna, kaniadto pa kini ginahatag sa mga kabataan ug naaprubahan na nga luwas ug epektibo kini.
Sa kinatibuk-an, alang sa Grade 1, ang target anaa sa 30,795, apan niabot lamang og 12,360, o 40 porsiyento ang nabakunahan.
Alang sa mga babaye nga Grade 4 nga tinun-an, ang target anaa sa 15,212, apan niabot lamang og 5,324, o 25 porsiyento ang nabakuhanan.
Alang sa Grade 7 nga mga magtutungha, ang target anaa sa 31,090, apan niabot lamang og 12,127 o 39 porsiyento ang nahatagan alang sa tipdas ug rubella, lakip na ang tetanus ug diphtheria.
Gipadayag ni Malubay nga kini nga target kab-oton unta gikan sa Septyembre hangtud Disyembre 2024; apan, ang gidaghanon sa mga magtutungha ubos kaayo, busa ang target gipadayon karong bulana.
Kini nga “low turnout rate” nihatud ngadto sa paglusad og mga pamakuna sa mga malls aron nga maabot sa mga magtutunga kinsa wala pa mabakunahi.
Ang buhatan nagtinguha nga makakab-ot og 95 porsiyento nga vaccination rate aron nga makuha ang gitinguha nga “herd immunity” alang niining ‘vaccine-preventable diseases’.
Giawhag niini ang mga ginikanansa Grades 1, 4, ug 7 nga tugtan ang ilang mga anak nga makadawat og bakuna, ilabi na kadtong na-enrol sa pribado nga mga tulunghaan kinsa way “access” alang kanila.
Subli gipasalig sa ahesnya sa mga ginikanan nga dili mabalaka, gumikan ang mga bakuna libre ug luwas sa lawas.
Kung ang mall vaccination di magmalampuson, ang DHO makigkoordinar na sa Department of Education (DepEd) sa pagpahibalo sa mga ginikanan atol sa unang Parent-Teacher General Assembly sa school year 2025 aron pahibaw-on bahin sa kaimportante sa pagtugot sa ilang mga anak nga mabakunahan.
Dugang pa niini nga gawas sa pagpakigkoordinar uban sa DepEd, nagtinguha sab ang ahensya nga makig-uban ang mga opisyales sa barangay ug purok leaders nga dasigon ang ilang mga tawo nga modawat sa mga bakuna.
