Nagkahiusa ang Gobyerno sa New Zealand ug ang Mindanao Development Authority (MinDA) sa ilang diplomatikong relasyon, nga nagatutok sa kalamboan ug agrikultural nga pagtubo sa Mindanao.
Ang pakigpulong tali sa New Zealand Ambassador nga si Dr. Catherine McIntosh ug MinDA Chairperson Secetary nga si Leo Tereso Magno, nagtuki sa mga nagapadayon nga inisyatibo ug mga bag-ong kolaborasyon aron mapalambo ang ekonomikanhong kalig-on sa rehiyon.
Ang mga diskusyon nagatutok sa pagpalig-on sa suporta sa New Zealand alang sa Mindanao, ilabi na sa agrikultura, edukasyon, ug kalamboan.
Gihisgutan ni McIntosh ang dedikasyon sa New Zealand pinaagi sa International Development Cooperation Program, nga nagpunting sa kalig-on ug kauswagan.
Usa sa mga importante nga hilisgutan mao ang Government-to-Government kon G2G Mango Project, nga duha ka tuig nga inisyatibo aron buhion pag-usab ang industriya sa mangga sa Mindanao nga adunay US$150,000 nga pondo.
Ang proyekto nagtinguha sa pagpaayo sa produksyon sa mangga, nga nagpunting sa mga isyu sa pesticide residue, pagtudlo sa mga operator sa pesticide, ug pagpalambo sa Good Agricultural Practices kon GAP.
Gipasiugda ni Vic Lao, ang New Zealand Honorary Consul alang sa Mindanao, ang kahinungdanon sa proyekto aron masiguro nga ang mga mangga sa Mindanao magpabilin nga globally competitive.
Nagpasalamaton usab si Magno sa padayon nga suporta sa New Zealand, ug gihatagan og pasidungog ang nagkadako nga international interest sa rehiyon nga napalambo gumikan sa pag-uswag sa kalinaw ug seguridad.
Gihisgutan usab sa panagpulong ang mga oportunidad alang sa mga Mindanawan nga mamahimong makapadayon og taas nga edukasyon sa New Zealand pinaagi sa mga scholarship grant, nga nagtinguha sa pagpalig-on sa mga indibidwal pinaagi sa world-class nga edukasyon.
Samtang nagasaulog ang duha ka nasud sa 60 ka tuig nga diplomatikong relasyon, gipasabot ni Magno ang kahinungdanon sa pakig-uban sa duha ka nasud alang sa pag-uswag sa Mindanao.
Ang mga diskusyon nagpasiugda sa mga prayoridad ni Presidente Ferdinand Marcos Jr., ilabi na sa pagpalambo sa malungtarong agrikultura, kalamboang rural, ug inklusibong pagtubo.
Pinaagi sa mga proyekto susama sa G2G Mango Project, ang duha ka nasud nagtumong sa pagdala og inobasyon, ekonomikanhong kalamboan, ug usa ka hayag nga kaugmaon alang sa Mindanao.
