Napogngan sa US Congress ang pagsulay nga pag-shutdown sa gobyerno sa Amerika human nga mapasaka ang budget deal niini.
Nauna nga gi-aprubahan sa US House of Representatives ang maong bill sa botong 366-34, ug milabay ang usa ka oras, gi-aprobahan usab kini sa US Senate sa boto nga 85-11, bisan paman nga milapas kini og sobra tunga sa oras gikan sa deadline nga alas-12 sa kabuntagon.
Sa ilawom sa bago nga spending plan, palapdon ang kasamtangan nga fiscal levels hangtod kini Marso 14, ug magahatag og $110 billion alang sa relief nga makatabang sa mga survivors sa natural disasters ug sa mga mag-uuma.
Apan, dili lakip sa maong pondo ang panginahanglan ni President-elect Donald Trump nga patas-an ang debt ceiling sa federal government, nga naka-apekto sa limitasyon sa iyang kapasidad sa pagdumala sa mga mambabalaod nga nag-gikan sa iyang kaugalingong partido.
Ang maong bill gipasaka na ngadto kang US President Joe Biden aron pirmahan ug mamahimong balaod.
Sa usa ka pahayag gikan sa tigpamaba ni Biden, gikompirma nga gi-aprubahan na sa Presidente ang budget deal.
Subay niini, naluwas ang Pasko sa kapin sa 800,000 ka mga trabahante nga nanginahanglan og suweldo nga posible unta nga maputol og mamahimo man nga magpadayon ang government shutdown, samtang gihunong usab sa White House ang ilang mga preparasyon alang sa shutdown.
Kahinumdoman, nga ang ulahing government shutdown sa Amerika nahitabo sa una nga termino ni Trump niadtong 2019, nga midagan og 35 ka adlaw ug gitala kini nga ang labing dugay nga shutdown sa kasaysayan sa Amerika.
