Nagtuo si House Committee on Human Rights Chairman Rep. Benny Abante nga dili mamahimong patas si Sen. Ronald “Bato” Dela Rosa sa himuong imbestigasyon sa Senado nga adunay kalabutan sa drug war.
Matod pa ni Rep. Abante nga si Dela Rosa ang nagsilbing hepe sa Philippine National Police (PNP) niadtong termino ni kanhi Pangulong Rodrigo Duterte.
Usa usab kuno kini sa mga giakusahang nalambigit sa mga pagsupak sa balaod, hinungdan nga dili mamahimong patas kung ang gitudlo sa testigo siya mismo nga mag-imbestiga sa hisgutanan.
Posible usab maapektuhan ang testimonya sa mga resource person kung ang mismong gisumbong nila ang mangutana sa detalye sa pagsupak sa balaod.
Matod pa ni Sen. Dela Rosa, dako ang posibilidad nga mutambong ang kanhi Pangulo sa higayong sila ang mag-imbita gumikan kay mas mahimong komportable kini sa imbestigasyon sa iyahang komite.
