Gisiguro sa Department of Education (DepEd) Davao sa padayon nga pag-supporta sa Department of Health ug City Health Office aron matubag ang panginahanglan sa kahimsog sa mga kabataan pinaagi sa School-Based Immunization Program (SBIP).
Tumong sa maong programa ang mabakunahan ang tanan nga kabataan sa Grade 1 ug Grade 7 batok sa Measles Rubella ug Tetanus Diptheria, samtang ang mga Grade 4 female pupils mabakunahan batok sa Human Papilloma Virus.
Subay sa mga rekord gikan sa Department of Education Davao City School Division, 71 ka mga tulunghaan, o 16% sa kinatibok-ang public schools sa Davao City, ang nabisita alang sa SBIP.
Gikan sa target nga 30,684 nga Grade 1 pupils, 2,422 ang nabakunahan batok sa Measles Rubella ug 2,415 batok sa Tetanus Diptheria.
Alang sa Grade 7, 1,368 nga estudyante gikan sa target nga 29,722 ka learners ang nabakunahan batok sa Measles Rubella ug 1,231 batok sa Tetanus Diptheria.
Samtang, gikan sa 15,342 nga Grade 4 female pupils, 1,054 ka learners ang nabakunahan batok sa Human Papilloma Virus.
Sumala ni Davao City School Division Superintendent Dr. Reynante Solitario, magpadayon kini nga aktibidad hangtod sa Disyembre karong tuiga aron mabakunahan ang tanan nga kabataan sa Grade 1 ug Grade 7.
