Gikumpirma sa kanhing warden sa Davao Prison and Penal Farm nga gitawagan kini ni kanhing Pang. Rodrigo Duterte ug gitimbaya human nga mapatay ang duha ka mga inmate nga kini gilangkuban sa tulo ka mga Chinese drug lords sulod sa bilangguan.
Gihimo ni Supt. Gerardo Padilla ang iyahang affirmation sa gihatag niini nga supplemental affidavit sa Quad Committee nga iyahang ipirmahan niatong September 4,2024.
Sa supplemental affidavit ni Padilla, gisuportahan niini ang pahayag nila Leopoldo “Tata” Tan Jr. nga nagkanayon nga mitawag si kanhing Pangulong Rodrigo Duterte kang Padilla aron kini timbayaon human nga nahimong nagmalampuson ang misyon nga patyon ang tulo ka mga Chinese drug lords nga sila Chu Kin Tung alias Tony Lim; Li Lan Yan, alias Jackson Li; ug Wong Meng Pin, alias Wang Ming Ping.
Sumala kang Padilla nga samtang nagbaklay kini kauban sila Tan ug Magdadaro nga naka posas padulong sa investigation section mitawag ngadto kaniya ang kanhing Pangulong Duterte.
Gibutyag sab ni Padilla nga gilayon sumala pa niining gisultihan ang mga kaubanan niini nga mitawag ang Presidente ug gitimbaya kini.
Samtang gipunto sab ni Padilla nga nablaka kini sa iyahang seguridad ug sa iyahang pamilya dinhi sa dakbayan sa Davao hinungdan nga napugos na lamang kini nga gibutang sa iyahang counter-affidavit niadtong August 27, 2024 nga wala siya’y nadawat nga tawag gikan kang kanhing Pang. Duterte.
Sa iyahang second supplemental affidavit nga gipirmahan niadtong Septyembre 9, iyahang gibarugan nga ang pahayag ni kanhing policeman Jimmy Fortaleza kabahin sa mga sirkumstansiya sa pagpatay sa tulo ka mga drug lords.
Giangkon sab ni Padilla nga nagkahinabi sila ni Royina Garma sa telepono ug gimanduan sumala pa siya nga dili kini mangilabot sa ilahang pagabuhaton.
Gihinabi sumala pa siya ni Col. Leonardo ug gisultihan nga patyon na niini ang tulo ka mga Chinese.
Si Garma ang ilado nga suod ni kanhing Pangulong Duterte ug natuboy usab kini sa posisyon isip PCSO general manager.
