DAVAO CITY- Nanawagan karun ang City Environment and Natural Resources Office lakip na ang uban pang mga buhatan ngadto sa tanang Dabawenyo ug mga langyaw nga mamahimong imintinar gihapon ang kalimpyo sa siyudad luyo paman sa ginapahigayong mga kalihokan atol sa pagselebrar sa ika 39th Kadayawan Festival dinhi sa dakbayan sa Davao.
Ginawhag sa maong buhatan ang katawhan nga batasanon ang paglabay og sakto sa ilahang mga basura ingon man ang pagtago niini ngadto sa ilahang mga kaugalingon sa higayon nga dili pa kini malabay gilayon.
Giklaro usab sa maong buhatan nga adunay gipangmuntar nga mga basurahan sa mga nagkadaiyang dapit ning siyudad kung diin asa mamahimong ilabay ang ilahang mga basura.
Hinoon, nagpasalig ang maong buhatan nga aduna usab mga personahe ang ilahang gipakatap nga andam mumintinar sa kalimpyohan sa siyudad apan nanghinaot kini nga mas ipakita sa matag Dabawenyo ang karesponsible ug kadisiplinado sa matag usa mapa-anaa may selebrasyon o wala.
