Gidili na ni Philippine National Police (PNP) chief Police General Rommel Marbil sa mga sakop sa kapulisan ang pagunit ug mga payong alang sa mga VIP.
Gipagawas sa nahisgutang opisyal ang direktiba gumikan kay gusto niining ibalik ang dignidad sa PNP uniform.
Dugang pa sa opisyal nga dili trabaho sa pulis ang magdala ug payong ug ipakita ang dignidad gumikan kay pulis sila sa katawhan.
Samtang kung kahinumduman, gipahayag sa PNP nga adunay kinatibuk-ang 373 ka mga sakop sa Police Security and Protection Group (PSPG) ang na-recall niadtong bulan sa Hulyo.
Gipahayag pa niini nga 143 PSPG personnel ang na-recall gikan sa mga nag-unang opisyal sa mga pribadong kumpanya nga nakarehistro sa gobyerno, 57 gikan sa mga retiradong heneral sa kapulisan, 14 sa mga resident aliens ug uban pang protectees.
Ang uban pang protectees nga na-recall ang security details ang gilangkuban sa 27 ka mga kanhi opisyal sa gobyerno, 17 sa national ug local officials, 16 sa mga local residents, 7 sa ex-congressmen, 6 sa mayor, 6 sa barangay captains, 3 sa bureau heads, usa sa gobernador ug usa sa undersecretary.
Niadtong bulan sa Hunyo, nagpagawas usab ug direktiba ang PNP Chief nga nagpahinumdum sa mga opisyal nga motutok sa kaluwasan sa publiko ug dili muhatag ug mga serbisyo sa mga pribadong indibiduwal.
