DAVAO CITY- Mokabat sa kapin usa ka milyon nga kantidad sa palusot nga sigarilyo ang nasakmit sa mga kapulisan atol sa gipahigayon nga operasyon sa Matina Pangi ning dakbayan sa Davao.
Subay sa report sa mga otoridad, usa ka giabandona nga bunkhouse sa Prk. 4-B sa nasampit nga baranggay ang gironda sa mga otoridad.
Atol sa gihimong operasyon pasado ala una ang takna kaganihang kaadlawon nadakpan ang usa ka alyays Mark, 43-anyos nga residente sa nasampit nga lugar human nga napalitan kini ug singkwenta ka mga reams sa sigarilyo nga YS Red.
Sa kinatibuk-an mokabat sa 101 ka ka mga kinarton nga sigarilyo ang nakumpiska sa mga otoridad nga nagkantidad ug P1,212,000.
Sa karon ang dinakpan ang gikustudiya na sa Talomo PNP ug mag-atubang kini ug kasong pagsupak sa RA. 10643.
