DAVAO CITY- Magpadayon ang paghatag og serbisyo sa Davao City Police Office (DCPO) ngadto sa publiko hilabi pa sa pagseguro sa kalinaw ug kahapsay sa dakbayan.
Kini ang gipasalig ni P/Capt. Hazel Tuazon, tigpamaba sa DCPO,nunot paman sa bag-ohay lamang nga gikabutyag ni PBGen Nicholas Torre III nga adunay manipulasyon sa datos sa krimen sa Davao City aron magpabilin kining ubos.
Sumala pa ni Tuazon, adunay kapasidad ug katungod ang regional director sa pagbutyag sa sitwasyon sa iyang mga ginsakpan apan mas maayo matud pa nga dili kini himoong balakid sa padayong paghatod og serbisyo sa katawhan.
Dugang pa niini nga mas maayong ang katawhan ang pangutan-on sa kamatuoran hilabi pa nga sila gayud ang makabati sa mga gipatumang seguridad sa dakbayan.
Una nang nipadayag og kapungot si Mayor Sebastian “Baste” Duterte kay PBGen. Torre human matud pa ang ginahimo niining pagmarunong sa sitwasyon sa dakbayan.
Hinoon, wala na kini gipatulan pa sa opisyal. Sa pikas bahin, dungan sa mainit nga sitwasyon sa duha ka opisyal mao usab ang paguwa sa balita nga gikonsiderang persona non grata sa Clabayong, Samar si Torre kaniadtong 2018.
Kabahin niini, daghan karon ang nagatoo nga adunay kalabotan ang mga panghitabo subay sa mando sa gobyerno.
