DAVAO CITY- Mokabat sa 6,949,000 ang standard drug price sa iligal nga droga kon shabu nga nakumpiska sa mga otoridad sa balay sa usa ka negosyante kaganihang kaadlawon.
Giila ang suspek nga si alias JOSE usa ka (PUPC)kon person under police costudy, 51-anyos, minyo ug residente sa B8, LOT9, NHA MA-A,ning dakbayan sa Davao City.
Subay sa report sa kapulisan, pasado alas tres takna kaganihang kaadlawon narekober ang dakong putos sa iligal nga droga kon shabu nga anaa sa iyahang kwarto nga sumala pa giputos kini ug transparent cellophane ug gibalot sa packaging tape.
Nakita kini sa mga otoridad uban ang suspetsado ug mga insulating witnesses nga gilangkuban sa opisyal sa baranggay ug sa Department of Justice atol sa pagsubay niini sa kapulisan.
Sumala pa sa mga otoridad nga ang pagkarekober sa iligal nga droga ang kabahin sa pagtug-an sa dinakpan nga adunay gibilin kini nga iligal nga droga sa iyahang pinuy-anan ug gumikan niini gilayon nga gipahigayon ang pagsusi sa mga operatiba sa Toril PNP.
Nasayran nga si alias “Jose” ang una ng nababagan sa usa ka checkpoint sa Task Force Davao ug kapulisan niadtong alas sais pasado ang takna sa gabii sa Brgy. Sirawan, Toril ning dakbayan uban ang usa ka babae nga si alias Ruby.
Niadtong tungura sakay ang mga nahisgutan sa usa ka kotse sa dihang pasulod kini sa dakbayan sa Davao apan nakumpiskahan kini ug iligal nga droga kon shabu nga adunay duha ka mga dagkong pakete nga nagkantidad ug P435,000.
Lakip sab sa nakumpiska sa mga nahisgutan ang usa ka.380 nga pistola nga adunay unom ka mga bala nga gikan sa mga dinakpan.
Sa pagkakaron ang mga nahisgutang dinakpan ang gikustudiya na sa Toril Police Station samtang gipanapahigayon pa usab ang dugang imbistigasyon sa tinubdan sa minilyon nga kantidad sa iligal nga droga.
Giandam na sab ang kaso nga ipasaka sa mga nahisgutan nga pagsupak sa RA 9165 ug ang pagsupak sa RA 10591 nga kabahin sa paghupot ug armas nga walay igong dokumento.
