DAVAO CITY – Gikompirmar ni Davao City Mayor Sebastian Duterte nga nakighinabi na siya kang Senador Christopher Lawrence ‘Bong’ Go human sa iyang nagdilaab nga pakigpulong sa rally sa Hakbang ng Maisug sa Pampanga niadtong Hunyo 17.
Kahinumduman nga gisaway ni Duterte ang padayong pagpakahilom ni Go taliwala sa mahinungdanong mga panghitabo sa Davao City.
Sumala ni Mayor Baste, nagtuyok lamang sa pulitika ang ilahang panagbikil ni Senator Go. Dugang pa nga walay problema si Mayor Baste sa senador ug matud pa “fair” lamang ang nahimong pamahayag niini.
Wala moluwat og public statement si Go aron mokomentaryo sa mga pasangil ni Duterte. Dihang gipangutana kon gibiyaan na ba ni Senador Go ang amahan sa mayor nga si kanhi Pangulong Rodrigo Duterte, gikanayon sa mayor nga posible kini tungod dili matag-an ang politika.
Gihisgutan usab niya nga nakigsulti siya kaniya isip usa ka botante, dili lamang isip usa ka kanhi chief of staff sa Presidente.
Si Bong Go naila nga kaalyado sa politika ug suod nga katabang ni kanhi Pangulong Duterte.
Samtang nagkalamat sab ang alyansa sa Duterte-Marcos, diin gigipit kuno sa kasamtangang administrasyon si Vice President Sara Duterte gumikan sa pagkupot og kontrobersyal nga P11-B confidential fund, ug Congresman Paolo Duterte sa paglaslas sa budget sa Davao City og P2 bilyones.
