DAVAO CITY – Nakaangkon ug samad ug mga bun-og sa kalawasan ang tulo ka mga magkabanay human nga gitabangan og kulata sa pipila ka mga indibidwal, ilawom sa tulay sa Bangkerohan, Magallanes, Brgy. 2-A ning syudad, duol sa bagsakan ug gulay sa Metro Circle.
Subay sa report sa kapulisan,nahitabo ang kagubot pasado alas singko ang takna kagahapon nga gikalambigitan sa magkabanay nga naila nga sila Miscelle Artiaga, 32-anyos, dalaga ug usa ka vendor, kauban niini ang iyahang igsuon nga si Allan Artiaga, 30-anyos, ulitawo ug usa sab ka vendor ug usa ka Carlos Lebrado, 66-anyos, minyo,self-employed nga susumang mga residente sa Purok 7, Bankerohan, Barangay 2-A, ning syudad.
Gilayon matud pa nga narespondehan sa mga auxillary police ang nasampit nga komosyon gumikan sa nahitabong pagpangulata ngadto sa magsuon gikan sa wala panganli nga mga indibdiwal samtang anaa kini sila sulod sa tindahan samtang nag-inom uban ang ilahang inahan.
Nasayran nga nagkalalis sumala pa ang mga nahisgutan lakip ang ilahang inahan.
Pagkataud-taud, aduna sumala pa’y wala mailhi nga mga bystanders nga nasamokan sa ilahang lalis ang misinggit ngadto kanila gawas sa tindahan ug nagkanayon nga “KINSAY ISOG DHA GAWAS KAY AMONG TABANGAN”.
Kalit nga miduol sumala pa ang grupo sa mga batan-on ngadto kanila ug nangulata.
Makita sab sa kuha nga video ang akto nga pagbunal ug pagkulata ngadto kanila.
Apan, una na sumala pa nga gibadlong ang mga gipangkulata tungod usa kanila ang nanghasi niadtong tungura ug adunay nangadaot sumala pa nga mga prudukto sa nasampit nga lugar.
Sa karon ang maong panghitabo ang giindorso na sa kapulisan sa baranggay sanglit dili na desidido nga mopasaka og kaso ang mga naargabyado aron didto sila maghusay batok sa mga batan-on nga nga nangulata ngadto kanila.
