DAVAO CITY – Gikabutyag sa Police Regional Office 11 nga magpahigayon og pre-hearing conference ang Regional Internal Affairs Service 11 alang sa gi-relyebo nga 35 ka mga opisyal sa Davao City Police Office kalabot gihapon sa nahitabong kamatayon sa 7 ka mga drug suspects sa mga buy bust operation sa dakbayan niadtong Marso human sa pagdeklara og war on drugs ni Mayor Baste Duterte.
Sumala kang PMaj. Catherine dela Rey, tigpamaba sa PRO 11, magpagawas ang mga nahisgutan sa ilahang mga counter-affidavit, ingon man pagpakita sa mga ebidensya nga nagpamatuod sa legitimacy sa ginapahigayong operasyon.
Sa pagkakaron, wala pa gibutyag ang schedule sa maong pre-hearing conference.
Girekomenda sa Regional Internal Affairs Service (RIAS)-Davao ang pag-relieve sa 35 ka personnel, apil na si DCPO Director nga si Col. Richard Bad-ang, subay sa motu proprio nga imbestigasyon niini sa buy-bust operations diin pito ka giingong drug pushers ang napatay sulod sa usa ka simana human gideklara ni Mayor Sebastian Duterte ang iyang “war against drugs.”
Usa ka adlaw human girelieve si Bad-ang, 34 ka laing mga pulis ang gitaktak sa katungdanan tungod sa samang imbestigasyon.
Ang mga na-relieve nga mga pulis gidestino na karon sa Regional Personnel Holding and Accounting Section (RPHAS) ubos sa PRO-11.
Kahibaloan nga gibarugan sa hepe sa Philippine National Police (PNP) nga si Director General Rommel Marbil nga kabahin sa nagpadayong imbestigasyon sa kamatayon sa pito ka gidudahang drug personalities atol sa operasyon niadtong Marso 23 hangtod 26 ang administrative relief sa 35 ka mga opisyal sa DCPO.
via || Bombo LJF
