DAVAO CITY – Gipasalig sa Davao City Police Office kon DCPO ang pagpakusog sa ilahang police visibility ug patrol activities aron paglikay sa krimen isip ilang nag-unang prayoridad, uban sa PCol. Richard Bad-ang, City Director, nga nagmando sa tanang station commanders ug unit commanders sa ilang mga area of responsibility.
Gimando usab sa DCPO ang dugang nga foot patrol sa mga uniformed ug non-uniformed police personnel. Kahinumduman nga girespondehan sa DCPO ang mga taho sa kaguliyang sa Barangay Riverside, Calinan, ug Bankerohan niadtong Mayo 15 ug 19, nga nagpamatuod sa mga taho ug nagpatuman sa gikinahanglang mga panagana aron masiguro ang kaluwasan sa komunidad.
Samtang nangandam na sa pagpasaka og kasong alarm and scandal ang Calinan Police Station sa pagpanguna sa ilang Station Commander nga si PMaj. Alberto Abella batok sa mga indibidwal nga nalambigit sa insidente sa Calinan.
Niadtong Lunes sa gabii, lima ka mga tawo nga nalambigit sa insidente sa Bankerohan ang ni-surrender sa San Pedro Police Station.
Matod ni PMaj. Michael Uyanguren, Station Commander sa San Pedro Police Station, nga kasong alarm and scandal sab ang ipasaka batok sa mga indibidwal nga nalambigit sa Bankerohan commotion.
Nipagawas og public apology ang mga hingtungdan tungod sa kagubot sa lugar. Nagpahinumdum ang DCPO sa publiko nga ang mga supak sa balaod nga binuhatan dili makalikay sa balaod ug mag-atubang og mga kaso aron mapugngan ang uban nga makapahinabog kasamok sa publiko nga makaapekto sa kalinaw ug kahusay sa syudad.
