DAVAO CITY – Nagpaklaro ang OCD 11 nga anaa lamang sa 111,984 ka pamilya o 490,458 ka indibidwal gikan sa Davao de Oro, Davao del Norte, Davao Occidental, Davao Oriental, Davao del Sur, ug Davao City ang apektado sa pagbaha sa miaging semana.
Apan nagpabilin gihapon sa 3,933 ka mga pamilya sa rehiyon ang gipabakwit tungod sa grabeng pagbaha ug landslide nga dala sa pagdaot sa panahon.
Lauman pa ang pagsaka sa gidaghanon sa mga barangay ug apektadong pamilya sanglit nagpahigayon pa sa Rapid Damage Assessment and Needs Analysis (RDNA) ang tanang apektadong local government units gumikan sa kusog nga ulan ug pagbaha niadtong Enero 18.
Misaka na sa 14 katawo ang ihap sa mga nangamatay atol sa nahitabong pagdahili sa yuta nga gipahinabo sa bag-ohay nga kusog nga pag-ulan gikan sa shear line nga nakaapekto sa daghang mga lugar sa Davao Region.
Gikatala sa Office of Civil Defense-Davao nga 11 ang namatay sa Barangay Mount Diwata sa lungsod sa Monkayo ug usa ang patay sa lungsod sa Maragusan, parehong sa Davao de Oro; ug duha ang namatay sa Davao City tungod sa landslides.
Dugang niana ang tulo ka tawo sa Mount Diwata sa Monkayo nga naangol sa pagdahili sa yuta ug usa sa lungsod sa Pantukan ug laing lalaki ang naangol sa baha sa Maragusan.
Dugang pa sa buhatan nga taliwala sa pag-hubas sa mga tubig baha sa daghanang dapit, magpabilin gihapong mag-igmat ang tanan nunot sa pag-arang arang sa lakat sa panahon.
