DAVAO CITY – Nangayo ug despensa sa mga katawhan ang Task Force Davao Commander nga si Col. Darren Comia sa hugot nga pagpatuman sa seguridad sa dakbayan karong panahuna hinungdan sa pagkalangay sa traffic og mga biyahero.
Gipakusgan sa Davao City Police Office ang full alert status pinaagi sa pagpatuman sa Oplan Davao Defense System kon Oplan DDS pinaagi sa pagpahigayon og checkpoints ug border control nunot sa pagpamomba sa Marawi City niadtong Domingo sa buntag diin lima ka tawo ang patay samtang 50 ang samdan sa pagbuto sa Catholic Mass nga gipahigayon sa Dimaporo Gymnasium Mindanao State University – Marawi City.
Ang Oplan DDS nagpahamtang ug mas hugot nga mga lakang sa seguridad sulod sa siyudad ug sa palibot nga mga utlanan.
Ang ubang mga lakang sulod sa Oplan DDS naglakip sa pagpausbaw sa mga paningkamot sa pagmonitor sa mga pampublikong luna.
Sa pakighinabi sa Bombo Radyo Davao ngadto kang Colonel Comia, gibutyag sab niini nga bisan paman wala pa nahitabo ang pagbusikad sa MSU-Main Campus sa Marawi City, naka deploy na matud pa ang mga personnel sa seguridad dinhi sa dakbayan sa kanya-kanya niining areas of responsibility sa tanang entry points sama sa Sirawan, Calinan, ug Lasang ning syudad lakip na usab sa mga coastal areas ug airports.
Matud pa ni Col. Comia, angay lamang nga mag double monitoring ang mga otoridad aron na usab sa pagpangandam sa umaabot nga kapaskuhan.
