DAVAO CITY – Gipangunahan ni Mayor Sebastian “Baste” Duterte ang Mass Oath-Taking Ceremony sa tanang Barangay Elective Officials sa Almendras Gym, Davao City, niadtong Nobyembre 13.
Gitambungan ang oath-taking sa mga midaog nga Kapitan ug Kagawad gikan sa 182 ka mga barangay atol sa Barangay ug Sanguniang Kabataan Election nga gipahigayon niadtong Oktubre 30 ning tuiga.
Alas dos sa hapon dihang niabot si Mayor Baste Duterte ug nanguna sa pagpanumpa sa mga bag-ong opisyal sa barangay diin iyang gipaambit sa mensahe ngadto sa mga nanumpa nga opisyal nga unahon una ang kaayohan sa mga konstituwente sa dili pa maghunahuna sa iyang kaugalingon, nga iyang gitawag nga selfless disposition.
Hangyo pa sa mayor ngadto sa mga bag-ong mangatundanan nga kalimtan ang mga panagbangi atol sa nakalabayng eleksyon.
Dugang pa niya nga ang politika usa lang ka sport, ang importante lang nga ang usa ka opisyal, makahimo sa iyang katungdanan sa hustong paagi ug iprayoridad sa kanunay ang mga panginahanglan, ingon man pagtubag sa mga isyu sa ilang tagsa-tagsa ka barangay.
via || Bombo DMA & Bombo LJF
