DAVAO CITY – Gikahasubo ni Tagum City Councilor Leo Revita ang nahitabong pagpangawat nga gikalambitan sa iyang kaubanan sa Team Hamloy nga si Sharmaine Jane Ramos o mas nailang si Ligaya.
Sa live video nga gipost kagabii sa konsehal, iyang gibutyag nga dili lamang kini ang unang higayon nga nasakpan si Ligaya nga nangawat sulod mismo sa iyang panimalay diin kaniadtong Enero 1 dihang nakapangawat kini og P81,000.
Nakuhaan sab sa CCTV ang maong binuhatan sa kaubanan apan nagpakahilom lamang ang konsehal gumikan sa kaluoy ngadto kang Ligaya.
Gikabutyag sab ni Revita nga pipila na sab nga giutangan sa nahisgutan ang nihapit sa iyang balay aron makapaningil. Niabot sab sa punto nga gipalayas na sa ilahang balay si Ligaya apan nakaapil gihapon sa mga vlogs sa grupo.
Gikakurat na lamang sa konsehal ug sa mga kaubanan sa Team Hamloy ang sagunsong pagpangawat ni Ligaya sa digital wallet app gikan Hunyo 1 hangdtod Setyembre 27 diin miabot og hapit P200,000 nga gikan sa halin sa iyang parlor franchise.
Gikompirma ni Revita nga iyang gipa-priso si Ligaya ug desidido nga pasakaan og kasong Qualified Theft ang 19 anyos nga kaubanan sa Team Hamloy.
Sumala sab sa kumpirmasyon sa hepe sa Tagum PNP nga si Lt. Col. Jeffrey Latayada, gikustodiya na ang maong personalidad nga nakauban ni Revita sulod sa usa ka tuig.
via || Bombo LJF
