DAVAO CITY – Gikatala sa Philippine Statistics Authority (PSA) nga mius-os ngadto sa 4.4% ang unemployment rate sa Davao Region niadtong 2022, nga adunay gibanabana nga 93,000 ka mga indibidwal nga nag-edad og 15 anyos pataas nga walay trabaho.
Natala ang pinakataas nga unemployment rate sa Davao del Norte nga dunay 5.1%, gisundan sa Davao City nga dunay 4.2%.
Samtang, ang mga probinsya sa Davao Oriental, Davao de Oro, Davao del Sur, ug Davao Occidental nakatala og ubos sa 4% nga unemployment rate sa susamang tuig.
Ang underemployment rates mikunhod og 3.9% kumpara sa 2020, diin ang Davao Occidental adunay pinakataas nga rate nga 25%.
Kapin sa 60% sa populasyon sa Davao Region ang kabahin sa labor force niadtong 2022, diin 2.32 ka milyon ang aktibong miapil sa labor force.
Ang Labor Force Survey, nga gipahigayon sa PSA, nagtumong sa pagtigom sa komprehensibong datos sa demograpiko ug socio-economic nga mga kinaiya sa populasyon.
via || Bombo LJF
