DAVAO CITY – Gibanabanaang mukabat sa P24.8 milyones nga kantidad sa ilegal nga druga, lakip na ang shabu, marijuana, ug cocaine, ang gidaub sa Philippine Drug Enforcement Agency (PDEA) XI sa usa ka pasilidad sa Barangay Malagamot, Panacan ning dakbayan.
Gikabutyag nga gikan sa mga rehion 11, 12 ug 13 ang mga nakumpiskang kontrabando. Sumala ni PDEA 11 regional director Naravi Duquiatan, nasa 2,570 kilos nga droga, kapin 200 kilos sa marijuana, ug dul-ang 780 gramos sa cocaine ang naggagikan sa tulo ka rehiyon sa Mindanao.
Ang paglabay sa mga nakumpiska nga druga, paraphernalia, ug expired nga tambal ang kabahin sa kampanya batok sa ilegal nga druga ug aron mapugngan ang pagkuyanap ug pagpahimulos niini.
Nahisubay ang nahitabong disposal sa Seksyon 21, Artikulo 2 sa Republic Act 9165. Gisaad sab sa ahensya ang nagpadayong pakigbatok sa ilegal nga drogas dungan sa pagdasig sa mga PDEA regional offices, law enforcement agencies, local government units, ug stakeholders sa pagpatuman sa paningkamot sa gobyerno ngadto sa drug-free regions.
via || Bombo LJF
