DAVAO CITY – Gibutyag ni Atty. Arcelito Albao, NBI 11 Regional Director, nga wala silay apil sa SITG Bragas nga gimugna sa Davao city Police Office, apan nimugna sila og kaugalingong niini Parallel ug independent investigation may kalabutan sa maong krimen.
Gibarugan usab sa NBI nga lehitimo ang drug buy-bust operation nga gihimo batok kang Renato “Empoy” Bayansao, tungod nasaksihan usab kini sa ubang sakop sa media, Department of Justice, taga-barangay, ug migamit usab sila og body cameras ug dokumentasyon sa gipahigayon nga operasyon busa imposible ang gina-ingon sa asawa sa dinakpan nga gitamnan og ebidensya ang iyang bana.
Kahinumduman, si alyas Empoy nadakpan sa joint drug buy-bust operation nga gihimo sa mga sakop sa Philippine Drug Enforcement Agency (PDEA) XI ug NBI XI pasado alas 12:00 sa tungang gabii, Mayo 27 didto sa Calinan Davao City diin, si Alyas Empoy, nakuhaan og 4 ka mga pakite sa gituohang shabu ug armas atol sa operasyon. Sumala pao ni Albao nga si alyas Empoy gitudlo sa pipila ka mga giingong saksi nga gihuptan sa NBI.
Matud ni Albao, aduna silay tulo ngadto sa lima ka mga persons of interests lakip niini si alyas Empoy. Gitawtaw ni Albao nga wala sila’y sakto nga timeline sa pagsulbad sa kaso, apan gipasalig niini nga ilang ginapaningkamotan karon ang tanan aron masulbad ang maong kaso.
Giklaro usab sa opisyal, nga dili sila nagapakata og punit og tawo ug ilaha usab kining ipaagi sa proseso ug ipailawom sa pagtaral sa korte aron masulbad ug matarung ang kaso.
