DAVAO CITY – Gilunop og tubig baha gumikan sa kusog nga ulan ang pipila ka bahin sa Mawab ug Nabunturan sa Davao de Oro niadtog adlawng Sabado.
Miabot sa 71 ka mga pamilya sa Purok 6, 10, 1, ug 3 sa Barangay Mipangi sa Nabunturan ang gipahikling tungod sa pagsaka sa tubig-baha.
Nakasulod sab sa mga panimalay sa lugar ang hangtud hawak nga baha sa lugar busa gipahigayon ang emergency evacuation sa Nabunturan Emergency Response Team.
Samtang, temporaryong nagpundo sa barangay gym ang mga pamilya nga nahatagan sab og pagkaon ug relief goods sa lokal nga kagamhanan. Gipahikling sab ang mga apektadong pamilya sa Barangay Malinawon sa Mawab tungod sa kusog nga pag-ulan sa lugar.
Nasinatian sab ang pagdahili sa lapuk og bato-bato sa maong bahin sa national highway sa Barangay Tuboran, apan dali kining giaksyunan.
Nidahili sab ang yuta sa Purok 12, Sitio Mahayahay sa Barangay Tuboran, apan gilusad sab sa MDRRMO ang clearing operations sa maong lugar.
Sumala sa PAGASA, localized thunderstorms ang hinungdan sa mga pag-ulan nga nipatigbabaw sa pipila ka bahin sa Davao Region niadtong adlawng Sabado.
via || Bombo LJF
