DAVAO CITY – Nakig-estorya si Police Regional Office 11 Director Brigadier General Alden Delvo ngadto kang Tagum City Mayor Rey Uy aron maghatag og dispensa sa nahitabong kalit nga pagtaktak kang kanhi chief of police sa syudad nga si Lieutenant Colonel Edgardo Bernardo.
Milungtad og kapin sa duha ka oras ang panag-istorya nila Uy ug Delvo mahitungod sa maong mga kakulian nga nagresulta sa pagputol sa pagtabang sa mayor sa tibuok kapulisan sa Tagum City.
Human sa maong pakighinabi, nahan-ay na ang nahitabong wala pagsinabtanay tali sa duha ka opisyal. Tungod niini, gihatag pagbalik sa lokal nga panggamhanan sa Tagum City, Davao del Norte ang ilang suporta ngadto sa ilang kaugalingong kapulisan.
Lakip na karon sa gibalik sa Tagum LGU ngadto sa Tagum Police ang upat ka patrol cars, gasoline and rice allowance, ug uban pang benepisyo sa kapulisan.
Sa pikas bahin, nag-courtesy call ang bag-ong acting chief of police sa Tagum City Police nga si Lieutenant Colonel Jeffrey Latayada kang Mayor Uy kagahapon sa buntag, Mayo 2.
Gituuhang nakig-istorya ang mayor sa bag-ong hepe mahitungod sa iyang bag-ong posisyon lakip na ang mga lakang nga ipatuman sa kapulisan alang sa seguridad sa syudad.
via || Bombo LJF
