DAVAO CITY – Napabilin sa Davao City Durians ang titulo niini isip defending champion human nga subli na usab nga nanguna sa bag-ohay lang natapos nga Davao Region Athletic Association 2023.
Sa final and official results, nakuha sa Davao City ang ikaunang pwesto diin aduna silay 174 gold medals, 109 silvers ug 82 bronze samtang anaa usab sa ikaduha nga pwesto ang Tagum City nga adunay 62 gold medals, 55 silvers ug 69 usab ka mga bronze medals ug ikatulong pwesto usab ang Davao del Norte nga adunay 36 gold medals, 35 silvers ug 59 bronze medals.
Sa kinatibuk-an, nakakuha ang Davao City ug 365 medals; Tagum City nga adunay 186 medals, Davao del Norte nga adunay 130 medals. Midagan ang DAVRAA sa Abril 23, hantud 28 ning tuig nga gipahigayon sa Tagum City.
Sa pikas bahin, gikabutyag sa DEPED Region XI, Spokesperson nga si Dodong Atillo ngadto sa Bombo Radyo Davao nga adunay dakong kabag-ohan sa umaabot nga Palarong Pambansa karong tuiga diin aron maka partisipar ang mga manduduwa sa Region XI sa Palarong Pambansa, kinahanglan nila daogon ang Mindanao League na ipahigayon sunod na mga bulan.
Giklaro niya nga usa ka prequalifiying game ang maong League, diin pagasalmotan kini sa tanang group teams nga nidaog sa ilahang tagsa-tagsa nga Regional Athletic Associations. Ang grupo nga anaa sa rank 1 ug rank 2 sa Mindanao League, maoy mahimong delegado sa Mindanao sa Palarong Pambansa.
