DAVAO CITY – Gihatod na sa ulahing kapahulayan ang 9 anyos nga si alyas “Mona” sa Madaum Public Cemetery sa Tagum City, Davao del Norte kagahapon, Abril 25 sa hapon.
Gidagsa sa mga kabanay ug pamilya sa biktima ang paglubong sa bata samtang ilang gipaabot ang tagsa-tagsa nilang pahasubo. Gikumpirma sa amahan sa bata nga sumala sa autopsy report, gilugos sa suspek ang bata una pa siya gipatay pinaagi sa pagbunal sa ulo sa biktima.
Una nang gikumpirma ni PCapt. Elfren Barredo nga natumbok na nila ang person of interest kinsa nasigpatan matod pa sa witness nga nigawas sa crime scene niadtong Abril 17 sa buntag, ang adlaw diin ulahing nakitang buhi ang biktima nga naghatod sa iyang manghod nga kinder sa Apokon Elementary School.
Gikumpirma sab ni Tagum City Mayor Rey Uy, gawasnon gihapon ang suspek nga anaa sa laing lugar.
Sa karon, gitibuok na sa kapulisan ang natigom nga ebidensya alang sa mas lig-on nga kasong ipasang-at batok sa nahisgutan. Hinuon gipasalig sa opisyal nga nagpabiling isolated ang kaso sa biktima.
via || Bombo LJF
