DAVAO CITY – Nadelatar ang gikahinaman nga implementasyon sa Davao City Bulk Water Supply Project nga una nang gikumpirma nga masugdan kaniadtong Marso ning tuiga.
Gikanayon ni Anna Lu, presidente sa Apo Agua Infrastractura, Inc. nga na-delay ang pag-abli sa maong proyekto gumikan sa sagunsong pag-ulan nga nasinatian hilabi na sa ikatulong distrito partikular sa Tamugan River ning dakbayan.
Giesplikar sab atol sa pag-atubang sa 20th Davao City Council kagahapon nga dunay nangadaot nga mga pipelines atol sa pag-repair sa usa ka contractor.
Gibutyag sab nga kinahanglang i-disinfect sab ang mga agianan sa tubig. Sanglit, namatikdan ang mga debris ug sediments nga manggawas sa tubig busa kinahanglan kini i-repair sa dugang pang panahon.
Wala pa hinuon insaktong petsa nga gihatag ang Apo Agua nga magsugod ang proyekto, apan gipaneguro sa kumpanya ang pagdawat og limpyong suplay sa tubig sa Tugbok area nga magsugod karong bulana.
Una nang gikumpirma kaniadtong Enero sa Apo Agua nga mamahimong fully operational na sa ulahing simana sa Marso ang maong patubig sa Davao City.
via || Bombo LJF
