DAVAO CITY – Nagbahad si Davao del Norte Governor Edwin Jubahib ngadto sa mga opisyal sa lokal nga kagamhanan nga dili gamiton ang mga goverment vehicles gawas sa trabaho.
Kana human sa nahitabong disgrasya sa usa sa mga sakyanan sa LGU sa usa ka iskwelahan sa Tagum City diin nalambigit si SK Federation President Emerson Dave Silutan.
Ang gobernador mismo ang mibutyag nga wala nagsakay sa nadisgrasyang government vehicle si Silutan, kon dili mga menor nga dili mga residente sa probinsya.
Sumala pa sa naunang taho nga nahaybol ang service vehicle ni Silutan sa bungbong sa Suaybaguio-Riña Elementary School diin nakasakay sa passenger seat ang opisyal.
Apan, subay sa gipagawas nga CCTV footage sa gobernador, wala naapil si Silutan sa tulo ka mga menor de edad nga gigawas sa nabangga nga sakyanan.
Gikatala sab sa incident report sa sekyu sa maong tulunghaan nga anaa sa insidente, puros lango sa ilimnong makahubog ang tulo ka mga menor.
Tungod niini, gipahugtan pa sa gobernador ang pagpagamit sa mga government vehicles sa mga awtorisadong drayber ug dili kini basta-basta ipagamit kon wala kini kalambigitan sa trabaho.
Gikabutyag sab ni Jubahib nga atubangon sa nahisgutang myembro sa Sangguniang Panlalawigan ang danyos sa nagubang iskwelahan lakip na sakyanan.
via || Bombo LJF
