DAVAO CITY – Gibutyag ni Police Major General Catherine Dela Rey nga epektibo na kaniadtong Marso 20 ang suspension of Permit to Carry Firearms (PTC) ug mulungtad usab kini hangtud Marso 31 ning tuiga, alas 11:59 sa gabie.
Matud pa ni Dela Rey, bugtong ang mga miyembro ug opisyales sa Philippine National Police (PNP), Armed Forces of the Philippines (AFP), ug uban pang mga law enforcement agencies ang tugotan nga magdala sa ilang armas. Dugang pa ni Dela Rey nga tumong sa pagpatuman sa PTC nga malikayan ang mga gun-related incidents sa tibuok rehiyon onse.
Sa pikas bahin, aduna na usab mga random checkpoints ang gipakatag sa tibuok rehiyon ug sumala pa sa ilahang datus, wala pa silay nadakpan nga mga indibidwal nga misupak sa maong balaod. Dako usab matud pa ang tabang sa pagsuspinde sa pagdala og mga pusil aron nga gamay ra ang ilahang bantayanan.
Kung ugaling man adunay masakpan nga naghupot og pusil, posible nga dili sila kasulod sa ilahang destinasyon, papaulion balik sa ilahang gigikanan o mamahimong ipa-deposit ang ilahang pusil sa mga checkpoints. Kahinumdoman nga una nang gi-awhag ni Dela Rey niadtong nakalabay nga adlaw ang publiko nga likayan ang pagdala og pusil atol sa ika-86th Araw ng Dabaw.
