DAVAO CITY – Suspendido ang usa ka opisyal sa Mati City, Davao Oriental nga si Councilor Xenna Princess Campos gumikan sa wala pagpirma sa mga resolusyon sa ilang ika-7 nga city council sa Sangguniang Pangulungsod sa panahon sa iyang pagpangatundanan.
Gipagawas na ang 15-day suspension order nga gidesisyonan sa Committee on Good Government, Public Ethics and Accountabilities human siya wala nakiglambigit sa usa ka panagpulong kaniadtong Pebrero 3 alang sa hisgutanang conditional deed of sale sa landowners sa tulo ka mga land properties nga gipalit sa ilang LGU.
Nanukad ang maong kontrobersya sa tulo ka resolusyon sa Sangguniang Pangulungsod kaniadtong Disyembre 20, sa milabayng tuig nga nagtugot nga aprubahan ni Mayor Michelle Rabat ang mga proyekto sa dakbayan.
Usa niini ang yuta nga tukuran sa Super Health Center sa Magapo, Barangay Central nga gipundohan sa gobyerno ug P16.5 million alang sa construction sa maong gambalay.
Nasayran sab nga nasayop ang kantidad nga nakabutang sa maong resolusyon nga gikan sa Bidding and Awards Committee.
Sumala pan ni BAC secretariat head Lucio Pequiro, anaa sa kapin P46 million pesos ang nakabutang nga kantidad nga giaprubahan sa LandBank nga taliwas sa total appraised value nga mukabat sa kapin P52 million.
Naghanyo matud pa ang LGU nga usbon ang maong resolusyon. Panahon sa pag-apruba niini sa 7th City Council, nagdumili si Campos nga pirmahan ang maong resolusyon.
Gikwestyon sa ubang konsehal ang nahimong lakang sa opisyal nga giuyunan sa iyang mga kaubanan. Gumikan sa maong panghitabo, tulo ka landowners ang wala na nabayaran sa Mati City LGU.
via || Bombo LJF
