DAVAO CITY – Gibanabana nga muabot sa 150,000 ngadto na sa 200,000 ka mga bisita ang muduaw diri sa dakbayan sa dabaw karong bulan sa Marso nunot sa pagsaulog sa syudad sa ika-86th nga Araw ng Davao. Sumala ni Harvey James Lanticse, City Information Office sa Davao, gibase nila ang nasangpit nga ihap sa 196,000 ka mga tourist arrival kaniadtong 2019 una ang Covid-19 Pandemic. Gumikan niini, lauman nga ipatuman sa kapulisan ang hugot nga seguridad aron masiguro ang kaluwasan sa publiko atol sa pagsaulog sa maong kalihokan ingon man ang uban pa nga mga dagkong aktibidad sa syudad sama sa MICE Conference nga magsugod gikan Marso 1 ngadto tres ug International Ironman 70.3 Triathlon nga ipahigayon sa Marso 26 ug uban pang kalihokan . Nangandam usab ang hospitality industry alang sa pag-akomodar sa mga bisita. Samtang, bisan una na gikanayon ni Vice President Inday Sara Duterte ug kanhi pangulo Rodrigo duterte ang lauman nga pagtambong niini sa selebrasyon, apan wala pay opisyal nga kumpirmasyon gikan sa mga nahisgutan. Gikanayon sa opisyal nga gisiguro sa kagamhanan ang kaluwasan sa tanan nga mutambong sa maong okasyon.
