DAVAO CITY – Padayon gipahigayon sa mga sakop sa City Social Welfare and Development Office – Davao (CSWDO) ang pag-validate sa ilang listahan sa mga nasunogan sa duha ka barangay sa Piapi Boulevard Davao City. Sumala ni Barangay 22 kagawad Betoy Cabantug, problema nila karon daghan mga residente ang wala pa miadto sa covered court hain nagpadayon ang balidasyon sa buhatan tungod mas gipili pa niini nga bantayan ang ilang gamit aron dili sila makawatan. Nasayran nga human sa nahitabong sunog gipahimuslan sa mga daotang tawo nga kawaton ang mga gamit sa mga nabiktima sa sunog . Nasayran anaa sa pito ka purok sa Barangay 22 ang naigo sa sunog apan ang Purok 6 ug 7 ang grabe naapektohan gumikan sa kadaghang balay gilamoy sa kalayo. Suma pa sa kagawad nga kadaghanan sa mga biktima nga nasunogan wlay nasalba nga mga gamit gumikan sa kalit nga natigayon sunog kaniadtong Sabado sa hapon. Gumikan niini, nanawagan na lamang ang opisyal ngadto sa Publiko og ayoda alang sa mga nabiktima sa sunog sama sa tubig, pagkaon, wala na gigamit nga sanina aron dunay magamit ang mga biktima nga kasamtangan gihikling sa Covered court sa nasangpit nga lugar.
