DAVAO CITY – Padayong gilibot sa mga sakop sa Maritime Industry Authority 11 (Marina 11) ang rehiyon onse aron i-rehistro ang mga bangka nga ginagamit alang sa island hopping ug uban pang tourism activities sa rehiyon. Kini ang gipahayag sa regional director sa buhatan nga si Liza Orongan, isip kabahin sa lakang nga subli pakusgon balik ang turismo sa Davao Region. Suma kaniya kinahanglan dunay prangkisa ang tanang bangka nga alang sa tourism recreational activities ug lisensyado ang mudumala niini , una kini sakyan sa mga turista. Matud ni Orongan, nga kinahanglan og prangkisa ang mga bangka ug lisensyado ang mudrayb niini aron dunay obligasyon ang mga tag-iya kon duna may mahitabo nga disgrasya. Suma pa, kon wala man kini mga prangkisa,walay makuha nga mga claims tungod wala kini mga insurance. Busa nanawagan kini ngadto sa mga turista nga siguradohon nga dunay prangkisa ang mga bangka hain imutar kini sulod sa sakyanan aron masiguro ang kaluwasan sa pasahero. Sa kasamtangan, nakig-alayon na ang Philippine Coast Guard ang ahensya aron dakpon ang mga bangka nga walay mga prangkisa.
