DAVAO CITY – Muabot sa 386 ang gikareport nga kaso sa Hand Foot Mouth Disease dinhi sa Davao Region.
Sumala sa gipagulang impormasyon sa Davao Center for Health Development sa Department of Health (DOH) gikan Enero 1 hangtud 21 ning kasamtangang tuig, pinakadaghan ang natala sa Davao de Oro nga anaa sa 110, Davao del Norte nga anaa sa 94, Davao City ang adunay 92 ka mga kaso, Davao Occidental nga anaay 77, Davao del Sur nga anaay 9 ug Davao Oriental nga adunay upat ka mga kaso.
Nasayran sab nga kasagaran sa mga biktima, mga batang nag edad 0 hangtud 9 years old. Gikan sa maong ihap, 169 niini mga babae samtang 217 ang mga lalaki.
Sa pikas bahin, naglusad sab ang DepEd og hugot nga monitoring lakip na ang surveillance sa tanang mga tulonghaan aron masiguro nga mapakgang ang pagkuyanap sa HFMD sa rehiyon sa Dabaw.
Gikanayon sa tigpamaba sa Department of Education XI nga dili angay kabalak-an sa mga ginikanan ang gakuyanap karon nga Hand, Foot and Mouth Disease sa dakbayan sa Dabaw tungod dili kini makonsidera nga outbreak ug kinahanglan lamang nga mahimong magbinantayon ug ipatuman ang responsible parenting.
Nanawagan usab ang buhatan ngadto sa mga ginikanan nga i-report gilayon ngadto sa mga magtutudlo kung ilang mga anak nakasinati og sintomas sa maong balatian aron dali kining maaksyunan.
via || Bombo AFS & Bombo LJF
