DAVAO CITY – Gikabalaka sa usa ka non-governmental organization ang paglambigit sa mga kabataan sa prostitusyon diri sa Davao City.
Sumala sa datos sa Talikala Inc., gibana-banaang muabot sa 4,000 ang nalambigit sa protistusyon sa siyudad sa Davao, samtang 40% niini nga mga menor de edad.
Sumala ni Jeanette Ampog, ang Executive Director sa maong organisasyon, nasayran sab sa ilang pagtuon atol sa International Day of No Prostitution, pinakabata nga shine girls ang anaa sa 13 ngadto sa 14 anyos ang pangidaron, samtang 11 anyos sab ang pinakabatang nalamabigit sa online prostitution.
Nabalaka ang organisasyon sa posibleng epekto sa prostitusyon sa mga bata sama sa early pregnancy ug ang mga sakit nga delikado sa mga kabatan-onan.
Gipunting ni Ampog nga nahimong dagkong suliran ngadto sa mga kababayen-an sukad pa sa pandemya ang nagpahinabong prostitusyon isip panginabuhian.
Tungod niini, gipanawagan karon sa buhatan nga tabangan ug dili pasagdan ang mga kababayen-an ug kabatan-onan.
Gihinumdom ang International Day of No Prostitution matag Oktubre 5 sa tuig alang kadtong mga nabiktima sa prostitusyon sa tibuok kalibutan.
via || Bombo LJ Florendo
