DAVAO CITY – Gihinumdum karong panahuna ang International Day for the Elimination of Violence Against Women nga nanukad niadtong Nobyembre 25.
Tungod niini, gikabutyag sa Department of Social Welfare and Development – Davao nga ubay-ubay na ang mga kababayen-an sa Davao Region ang nakasayod sa ilahang katungod ilawom sa VAWC kon Violence Against Women and Children law.
Gikanayon sa social welfare officer sa ahensya nga si Sherlyn Concubierta, daghan nang kababayen-an ang nidangop na sa ilang opisina aron ireklamo ang nagpahinabong pagpangabuso kanila.
Sigun sa datos sa buhatan, adunay 27 ka mga biktima sa pagpangabuso nga natala gikan sa una ngadto sa ikatulong bahin ning tuiga.
Ginatabangan sa buhatan ang mga biktima sa unsay angayng buhaton tungod kasagaran kanila, nagpabilin gihapon sa poder sa asawa kon partner taliwala sa pagpangabuso kanila.
Busa, ilang ginadasig ang mga babaye nga mubarog ug dili magpa-daug daug.
Agig paghinumdon, gipakusgan pa sa DSWD 11 ang ilang kampanya batok pagpangabuso sa kababayen-an isip nag-unang suliran sa gender equality, public health, ug tawhanong katungod.
Kanunayng abli sab ang Crisis Intervention Center sa ahensya alang sa pagdalit ug tabang sikolohikal ug legal alang sa mga babayeng biktima sa pagpangabuso.
via || Bombo LJ Florendo
