DAVAO CITY- Mas gipahugtan karon ang seguridad sa syudad pinaagi sa pagpatuman sa Oplan DDS o Oplan Davao Defense System.
Kini mismo ang gikanayon ni PMaj. Rosario Aguilar, hepe sa Ecoland Police Station sa pakighinabi sa Bombo Radyo Davao.
Ang maong lakang ang subay pa gihapon sa nahitabong bus bombing sa Tacurong City niadtong nakalabay nga Dominggo diin miresulta kini sa pagkamatay sa usa ka indibidwal ug pagka-angol sa 11 ka mga pasahero.
Sumala sa mga personahe sa Ecoland PNP, gilayon nilang gipatuman ang maong kalihukan aron nga masiguro nga luwas ang siyudad sa susamang panghitabo ilabi na nga hapit na usab ang yuletide season.
Gipanaad sa kapulisan nga bisan pa man nga walay nadawat nga direct threat o hulga ang syudad, dili gihapon sila pakumpyansa.
Alang sa Ecoland PNP, ginapahigayon sa mga sakop niini ang maong aktibidad gikan alas 4 sa kadlawon hangtud na sa kagabhion sa tanang checkpoint areas sama na lamang sa Tulip Drive, Sandawa,Times Beach ug Kawayan Drive nga maoy area of responsibility sa nahisgutang istasyon.
Aduna usab pipila ka mga motorista ang gipangtagaan og citation tickets human nga walay suga ang gimanehoang sakyanan, nasakpang expired na ang lisensya o dili ba kaha nabilin ug wala na-renew ang ilang OR/CR.
Hinoon, malipayong gitaho sa kapulisan nga responsable ang mga motorista sa siyudad ug kabalo gayud sa sumbanan nga ginapatuman sa dakbayan.
Samtang, nanghinaut ang kapulisan ngadto sa tanan ilabi na sa mga motorista ug pasahero nga tas-an gayud ang pasensya tungod ang maong kalihukan ang gibuhat tungod ug alang lamang sa kaluwasan sa tanan.
